Sen querer replicar o sistema orixinal perdido óptase por dispoñer sobre as trazas do muro un sistema de vigas de madeira de gran canto e extrema esvelteza, conformando un sistema triangulado aproveitando as fendas, resaltes e perforacións do muro existente. Un tabique intermedio que separa a zona de atención ao público do almacén posterior adopta unha xeometría que reforza a traza do novo sistema de vigas e permite aloxar repisas, mobiliario e elementos de exposición de produto. Resulta desta forma un sistema quebrado que trata simultaneamente de romper a configuración profunda do local, xerar unha imaxe actual e recoñecible e poñer en valor a altura do local e a peculiar xeometría do muro de pedra.

Trátase dunha intervención mínima en termos de custo e tempo de execución, na que se aproveitan elementos orixinais do edificio como as reixas exteriores, que se converten en portas engadíndolles un sistema de peche e vidro, e elementos de anteriores reformas como as chapas metálicas que se recolocan no chan do local. Os demais elementos engadidos tratan de reducirse a un único material, a madeira, traballada en formatos industriais de gran dimensión, por tratarse dun material natural, ecolóxico e sostible e que se vincula tanto a arquitectura vernácula e tradicional como á contemporaneidade, o que establece un vínculo cos principio fundamentais da marca Bico de Xeado e a súa produción local, ecolóxica, sostible e de alta calidade.

Respectando o Plan Especial de Protección do Conxunto Histórico Artístico de Baiona, a fachada non sofre ningunha intervención salvo labores de limpeza e conservación da fábrica de pedra e dos elementos de forxa metálica.

En resumo, se trata dunha intervención que busca simultaneamente a creación dunha imaxe recoñecible para a marca partindo das particulares características dun local do casco histórico de Baiona sen renunciar por elo a unha máxima economía de medios e prazos de execución e ao uso dunha linguaxe simple e contemporánea. «

Juan Ignacio Prieto López, Faustino Patiño Cambeiro e Andrea Fernández Fernández